Lou courbach e lou renart dap las tournes deu courbach

 [ 🐦 ] Aci, que s’ayéch d’adaptacioû de la méy lìbré d’û pouèmi classìqué francés, apoulingat per û suplementot deus descouneguts…

Lou courbach e lou renart

Moussu Courbach sus û branc apitat,

Qu'abè hèyt peta û roumàdyé.

Moussu Renart per l'aulou enguiscat,

Qu'arribè chens brut ni tapàdyé.

« Pràubé macarèu de courbach,

Qu'ès frésc coum û curè,

Que cantes haut ou bach,

E que-t luséch beroy la plume.

Per aco n'as pas pòu à la brume,

Arrés capbath deu païs ne-t pot pas embraca. »

Autalèu lou corbach de sa bouts la méy bère,

Cap au cèu que-s hique à chiula.

Lou roumàdyé entér téms que-u cadou ta per tèrre,

Lou renart enta l'abé se-n hé û lampat.

Arrés coum l'ausèth atrapat.

« Bè t'arraya las pus !

Que saberas praubin,

Qu'enloc de ha lou fièr,

Que-s cau cara û drin. »

Las tournes deu courbach

Qu’aberi boulut, Segnou, ha-p û presén reyau,

Pramou, d’aquéstés bos, ce dits chens brigue arrìsé,

Qu’ètz lou réy deus herums, aquiu n’y a pas de dìsé !

Bòsté cos agradiu qu’éy amourlat aus tours,

E Diu que-u besti de séde e de belours.

Bòsté esquîe lusénte qu’éy chens plécs ni baches,

Qu’abétz debath lou nas dues bères moustaches,

Entau coum û fièr sourdat, balén e plâ quilhat.

Toutû que-p manque quàuqu’arré : B’éy doungues pecat

Que, coum l’esquiròu, n’ayatz pas ûe coue,

Dap û gran floc plantat au soum, coum à la soûe.

« You n’èy pas coue nade ! espie drin, Moussu. »

Ce cride lou renart, tout en bira-s de cu,

Picat en soun ourgulh, e fièr de soun panache,

Qui-u s’arisse la moustache,

E-s pensè labéts, qu’amucha soun plumét.

Més lou malî de courbach, proùmpté coum l’eslambréc,

Qu’arrape lou roumàdyé e que se-n ba cop séc,

Dap la prése au soû bèc, sus la méy haute branque.

Quoan lou renart s’arrebirè, que pensè càdé à l’endarrè :

Lou roumàdyé e l’ausèth que-s troubaben de manque !

…O be-p pensatz louquoau deus dus per la fî estou lou méy counfus ! [ 🐦 ]